Bazaviy stipendiya: “4” va “5” baholarga o‘qiganlar uchun
569 000 so‘mlik bazaviy stipendiya davlat granti, ya’ni "budjet"da o‘qiydigan talabalarga beriladi. Talaba semestrni asosan “to‘rt” va “besh”lar bilan yopsa, hamda hech qanday akademik qarzi bo‘lmasa, stipendiya davom etadi.
Agar semestrda biror fan bo‘yicha "uch" chiqsa yoki qarz paydo bo‘lsa, stipendiya OTM tomonidan vaqtincha to‘xtatilishi mumkin. Talaba baholarini tiklagach va qarzlardan o‘tgach, to‘lov qayta boshlanadi.
A’lochi talabalar uchun oshirilgan stipendiya
683 000 so‘mlik oshirilgan stipendiya baholari faqat "besh" bo‘lgan yoki, agar universitetda reyting tizimi bo’lsa, 86 balldan yuqori natija ko‘rsatgan talabalarga beriladi.
Sharoit o‘zgarsa, masalan, qarz chiqqan yoki baholar pasaygan bo‘lsa — stipendiya avtomatik to‘xtaydi va talaba yana bazaviy stipendiyaga qaytadi. Natijalar tiklangach, oshirilgan stipendiyaga qaytish mumkin.
Ikki baravar stipendiya: kam ta’minlanganlar ro‘yxatidagi a’lochilarga
Ikki baravar stipendiya — bu ijtimoiy qo‘llab-quvvatlashning kuchaytirilgan shakli. Uni faqat rasmiy ehtiyojmandlar reyestrida bo‘lgan, sessiyalarni faqat “besh” bilan yopadigan talabalar olishi mumkin.
To‘lov miqdori bazaviy stipendiyaning ikki baravari — oyiga taxminan 1,1 million so‘m. Qarorni universitetning maxsus komissiyasi qabul qiladi. Talaba reyestrda bo‘lsa ham, stipendiya avtomatik berilmaydi, hujjatlar va holat alohida ko‘rib chiqiladi.
Kontraktda o‘qiydiganlar stipendiya olishi mumkinmi?
Ha, mumkin — lekin faqat ikki holatda.
Agar talaba stipendiyali kontrakt tanlagan bo‘lsa. Bu oddiy kontraktdan qimmatroq bo’ladi, lekin evaziga talaba budjetdagilar kabi har oy bazaviy stipendiya oladi. Lekin bu faqat qarzlar va tartibbuzarliklar bo‘lmagandagina davom etadi.
Agar semestrni faqat “besh”lar bilan yopsа. Bunda OTM unga bazaviy stipendiyaning taxminan 20% miqdorida rag‘bat puli belgilashi mumkin — hozircha bu 110 000 so‘m atrofida.
Lekin kontraktda o‘qiydiganlar oshirilgan yoki ikki baravar stipendiya olish huquqiga ega emas. Bu to‘lovlar faqat budjet talabalari uchun.
Stipendiyalar bo‘yicha qisqa xulosa
- O‘qishdagi baholar va qarzlar stipendiyaning davom etishiga bevosita ta’sir qiladi. “Uch” baho yoki qarz bor bo‘lsa, to‘lov vaqtincha to‘xtashi mumkin
- Bazaviy stipendiya — barqaror “to‘rt” va “besh”lar uchun, oshirilgani — a’lo o‘qiganlar uchun, ikki baravar to‘lov esa — ijtimoiy ehtiyojmand oilalardan chiqqan eng yaxshi talabalarga beriladi.
- Kontraktdagilar yaxshi o‘qisa, kichik qo‘shimcha rag‘bat olishi mumkin, lekin oshirilgan yoki ikki baravar stipendiya ularga berilmaydi.
- Bundan tashqari, imtiyozli va Prezident stipendiyalari ham bor — ular alohida tanlov orqali beriladi. Ularga qanday ariza topshirish mumkinligi haqida boshqa maqolalarda gaplashganmiz.
