Oltin-Arashan, Qirg‘iziston
Bu joy — tog‘ havosi, archazor, buloqlar va sukunatni yaxshi ko‘radiganlar uchun ajoyib manzil. Oltin-Arashanda kunni issiq buloqda cho‘milish, tog‘ yo‘llarida sayr qilish yoki daryo shovqinini tinglab, o‘tovda dam olish bilan o‘tkazish mumkin. Yurishga hafsalangiz bo‘lsa, Olako‘l sari yo‘l olib, muzlikka ham chiqing.
Qirg‘izistonga kirish uchun ID-kartani o‘zi yetadi. Xorijga chiqish pasporti kerak emas. Faqat yo‘l Qozog‘iston orqali bo‘lsa, pasportsiz o‘tkazishmaydi. Oltin-Arashan darasiga kirishda kichik ruxsatnoma olinadi. Bog‘ga kirishdagi nazorat-o‘tkazish punktida sizdan o‘tish uchun taxminan 2 dollar so‘rashadi.
Eng arzon variant — Bishkek orqali avtobusda borish. Reyslar “Olmazor” metrosidan jo‘naydi, chiptalar narxi 23 dollardan boshlanadi. Bishkekdan Qorako‘lga avtovokzaldan avtobuslar qatnaydi. Chipta narxi taxminan 7 dollar, yo‘l sakkiz soatcha davom etadi.
Samolyotda ham borish mumkin. Toshkentdan Bishkekka har kuni Uzbekistan Airways reyslari bor, uchish vaqti 1 soat 10 daqiqa. Bir tomonga chipta narxi 115 dollardan, borib-kelishga esa 240 dollardan boshlanadi. Bishkekdan esa taksida Qorako‘lga yoki “Teploklyuchenka” tepaligigacha 7–10 dollarga yetib borish mumkin.
Umumiy xarajatlar:
- gestxauslar yoki o‘tovlarda yashash — bir kecha uchun 15 — 60$;
- kafeda ovqatlanish — 6 dollardan
- ot minish — 11 dollardan, Ak-Suu Kench issiq buloqlariga borish — soatiga 4–5 dollar;
- Bishkekdan Oltin-Arashan tepaligigacha taksi — kishi boshiga $12;
- Qorako‘ldan jip-transfer — 6 kishigacha bo‘lgan guruh uchun 200 dollar.
Issiqko‘l, Qirg‘iziston
Nima qilish mumkin. Yoz mavsumida albatta, cho‘milish. Issiqko‘l tiniq suvi va qumli plyajlari bilan mashhur. Agar ko‘lda suzish zerikarli bo‘lib qolsa, qayiq, kater yoki yaxta olish mumkin. Tog‘larga chiqish, ot minish yoki tungi yulduzlarni kuzatish ham mumkin.
Qanday boriladi. Eng qulay yo‘l — samolyot. Yoz mavsumida Toshkentdan Issiqko‘l aeroportiga Centrum Air to‘g‘ridan to‘g‘ri reyslar qo‘yadi. Chipta narxi 80–200 dollar atrofida.
Issiqko‘lga Bishkek orqali ham borish mumkin. Toshkentdan Bishkekka Uzbekistan Airways, Centrum Air va Tez Jet reyslari qatnaydi. “Olmazor” metrosidagi avtovokzaldan tungi avtobuslar ham yo‘lga chiqadi. Chipta narxi 23 dollar, yo‘l esa taxminan 13 soat davom etadi.
Bishkekdan Issiqko‘lga borish usullari ko‘p. Masalan, ko‘l bo‘yidagi Cho‘lponota shahriga avtobusda 6 dollarga borish mumkin. Yoki Baliqchi shahrigacha poyezd yuradi. Lyuks kupe chiptasi ham taxminan 6 dollar.
Shimbuloq va Qozog‘istonning boshqa tog‘li joylari
Nima qilish mumkin. Medeu–Shymbulak osma yo‘li orqali tog‘larga chiqish, daralar ustida paraplanda uchish, Ko‘lsoy ko‘llariga yoki Chorin kanyoniga ekskursiyaga borish mumkin. Qozog‘iston tog‘lariga gap yo‘q!
Hujjatlar. Xorijga chiqish pasporti kerak. Agar mashinada ketmoqchi bo‘lsangiz, haydovchilik guvohnomasi, transport hujjatlari va sug‘urta bo‘lishi shart. Ulardan nusxa oling, chegarada kerak bo‘ladi. Ro‘yxatdan o‘tmasdan davlatda 30 kungacha qolish mumkin.
Qanday boriladi. Toshkent — Olmaota poyezdi bilan borish mumkin. Yo‘l vaqti taxminan 18 soat, kupe joyi narxi 50 dollar atrofida. Agar sizda Visa yoki MasterCard xalqaro to‘lov kartasi, masalan TBC Salom bo‘lsa, chiptalarni Qozog‘iston temir yo‘llari saytida ham olish mumkin. U yerda narx taxminan 40 dollar, lekin ro‘yxatdan o‘tish uchun Qozog‘iston raqami kerak bo‘ladi. Poyezdlar har kuni Shimoliy vokzaldan jo‘naydi.
Tezroq borish uchun samolyotni tanlang. Reyslar:
- Centrum Air — Toshkentdan haftasiga 2–3 marta, bir tomonga 83 dollardan, borib-kelish 150–170 dollar;
- Uzbekistan Airways — har kuni, bir tomonga 90–110 dollar, borib-kelish 180–220 dollar;
- Air Astana — bir tomonga 100–120 dollar, borib-kelish 200–240 dollar.
Olmaotaga O‘zbekistonning boshqa shaharlaridan ham uchish mumkin: Nukusdan Uzbekistan Airways reyslari bor, Samarqanddan esa Fly Arystan qatnaydi.
Umumiy xarajatlar:
- Shymbulakdagi hostellar yoki 3 yulduzli mehmonxonalar — bir kecha uchun 50 dollardan; tog‘ manzarasiga qaragan uylar — ikki kishi uchun 350 dollardan;
- Shymbulak kanat yo‘li — ikki tomonga 21 dollar;
- Shymbulakdagi kafelarda ovqatlanish — 10–40 dollar;
- ot minish — bir kishi uchun 7,5 dollardan; paraplanda uchish — instruktor bilan 55 dollardan; o‘rmon ustida zipline — 28 dollardan;
- Olmaotadan Chorin kanyoniga ekskursiya — 20 dollar, Ko‘lsoy ko‘llariga — 30 dollar.
Pomir, Tojikiston
Nima qilish mumkin. Xorog orqali Pomir avtomagistrali bo‘ylab sayohat qilish, muzlik ko‘llarida cho‘milish, gestxauslarda to‘xtash, uyda tayyorlangan chernikali yogurtni tatib ko‘rish va qorli cho‘qqilarni zabt etish mumkin.
Hujjatlar. Tojikistonga kirish uchun xorijga chiqish pasporti kerak. Pomir hududi (ya’ni TBAH) uchun esa alohida ruxsatnoma olinadi. Toshkentdagi elchixonada yoki Dushanbeda 4–5 ish kunida rasmiylashtiriladi. Davlatda bepul 30 kungacha qolishingiz mumkin.
Qanday boriladi. Samolyotda uchish vaqti atigi 2,5 soat. Uzbekistan Airways reyslarida Toshkent — Dushanbe chiptalari 77 dollardan boshlanadi. Centrum Air ham Dushanbega uchadi. Narxlar 67 dollardan.
Eng tez yo‘l — samolyot, parvoz vaqti atigi 2,5 soat. Uzbekistan Airways reyslarida Toshkent — Dushanbe chiptalari 77 dollardan boshlanadi. Centrum Air ham Dushanbega uchadi — narxlar 67 dollardan.
Toshkentdan Dushanbega avtobusda 17–18 soatda borish mumkin. Avtobuslar “Olmazor” metrosi yonidagi avtovokzaldan jo‘naydi, chipta narxi 22 dollar. Uxlab ketadigan maxsus avtobuslar ham bor, narxi 25 dollar.
Haftada bir marta Toshkent — Dushanbe poyezdi qatnaydi. Yo‘l vaqti 19 soat, kupe chiptasi 40 dollar turadi. Chiptani faqat vokzal kassasidan xarid qilish mumkin.
Umumiy xarajatlar:
- kichik oilaviy mehmonxonalar yoki 3 yulduzli mehmonxonalarda yashash — bir kecha uchun 17 dollar dan boshlanadi;
- Xorogda ovqatlanish — kuniga 5 dollar dan boshlanadi;
- Pomir tog‘lariga borish uchun ruxsatnoma — 5-10 dollar.
Zomin, O‘zbekiston
Zomin — uzoqqa bormasdan, betakror tabiat qo‘ynida dam olish uchun eng yaxshi joylardan biri. Yashil tog‘lar, 700 yillik yong‘oq daraxti, qoyatoshlar, g‘orlar va hatto shisha ko‘prik — bu yerda hammasi bor.
Qanday hujjatlar kerak. Faqat ID karta. Zomin qo‘riqxonasi chegara yaqin joylashgani uchun yo‘lda hujjatlar tekshirilishi mumkin.
Qanday boriladi. Eng qulay variant — bir kunlik ekskursiya. Taxminan 28 dollar turadi. Toshkentdan avtobusda olib ketishadi, asosiy joylarni ko‘rsatishadi va yana qaytarib olib kelishadi.
Zomin yaqinidagi shaharchagacha uchish vaqti 45 daqiqa, chipta 11 dollardan (bagajsiz). Keyin qo‘shimcha taksi kerak bo‘ladi.
Avtobusda “Olmazor” metrosidagi avtovokzaldan Zominga borish taxminan 3 soat, chipta 4 dollar.
“Afrosiyob” poyezdida Dashtobod bekatigacha 1 soatda borish mumkin, chipta 14 dollardan. Keyin Zominga taksi bilan borasiz. Yana bir variant — Jizzaxgacha borib, u yerdan mashina olish.
Umumiy xarajatlar:
- mehmonxonada tunash — bir kecha uchun taxminan 165 dollar;
- Zomin qo‘riqxonasiga kirish — 1,5 dollar;
- choyxona va oilaviy kafelarda ovqatlanish 3 dollardan;
- kanat yo‘li — 7 dollar;
- shisha ko‘prikka kirish — taxminan 4 dollar.
Agar dam olish kunlari yo‘lga chiqsangiz — gid va avtobus bilan guruhda sayohatni sotib olishingiz mumkin, butun sayohat bir kishi uchun 27$ dan boshlanadi.
Xulosa
Eng yaqini va arzonrog‘i Zomin, ayniqsa tur olsangiz. Eng qimmati — Qozog‘istondagi Shimbuloq. Bu, bizning “Amirsoy”ga o‘xshagan kurort joy.
Tanlang:
- Go‘zal joylar va toza havoni istaysizmi — Oltin-Arashan.
- Tog‘lar va ekstrimni istaysizmi — Shimbuloq.
- Xayking, tabiat va jimjitlikni sevasizmi — Pomir.
- Tabiat qo‘yniga borib, miriqib nafas olishni xohlaysizmi — Zomin.
